Bolseiros de Sostibilidade, Participación e Integración Universitaria da USC visitaron o parque eólico experimental de Sotavento

Os bolseiros de Sostibilidade, Participación e Integración Universitaria visitaron o parque eólico experimental de Sotavento, situado na comarca da Serra da Loba. Coa actividade, programada dende a coordinación do Plan de Desenvolvemento Sostible, pretendíase dar a coñecer a estes alumnos as principais tecnoloxías para a obtención de enerxía a partir de fontes renovables e concienciar sobre a necesidade dun cambio de hábitos nos fogares e así acadar maior aforro de enerxía.
Dende 1997 o parque eólico de Sotavento coordina iniciativas públicas e privadas nun proxecto onde se representan as tecnoloxías eólicas implantadas en Galicia. Na actualidade investigan outras enerxías renovables como a solar (térmica e fotovoltaica), fomentan cultivos enerxéticos e proximamente comezarán experiencias pilotos de obtención de enerxía a partires do hidróxeno.
Durante a estadía os universitarios visitaron a aula divulgativa, o taller de enerxía onde se expón un aeroxerador real e paneis con tubos colectores térmicos, a sala de eficiencia enerxética e o auditorio, cunha exposición sobre o cambio climático. A actividade completouse cunha marcha polos diferentes aeroxeradores instalados no parque.