Alumnos de Kirguistán, Uzbekistán e Tayikistán estudan este curso na USC

Un total de once alumnos asiáticos procedentes de Kirguistán, Uzbekistán e Tayikistán estudan este curso académico na Universidade de Santiago a través do programa ‘Erasmus Mundus, External Cooperation Window’, que pon en marcha por vez primeira a Comisión Europea. Para estes estudantes, que dende a súa chegada a Galicia asisten a cursos intensivos de español, será o seu primeiro contacto co sistema universitario europeo e coa realidade cultural e social galega.
As principais características deste programa concedido á USC –primeira institución universitaria galega que o acada- presentáronas hoxe o vicerreitor de Relacións Institucionais, Lourenzo Fernández, e o coordinador de Relacións Exteriores, Manuel Fernández Grela. A iniciativa, que ten como obxectivo principal facilitar a mobilidade entre todos os membros da comunidade universitaria da Unión Europea e Asia Central, facilita a matrícula na universidade, un seguro médico adicional, entre 1.000 e 1.800 euros ao mes segundo o nivel académico do alumno e unha dotación económica a maiores para sufragar os custes da viaxe.
En xeral, un total de 46 universitarios asiáticos solicitaron estudar nas universidades de Europa ofertadas acolléndose a este programa que, entre outros fins, procura promover unha oferta de ensinanza superior de calidade, facilitar o entendemento entre os pobos, fomentar a adquisición de titulacións europeas, desenvolver a cooperación entre os centros de ensinanza superior da Unión Europea e centros de terceiros países e mellorar a súa visibilidade. A de Santiago resultou ser a Universidade que, das sete participantes, acolle o maior número destes estudantes.
‘Erasmus Mundus’ é o único programa europeo –que tamén se estende a docentes- que funciona cara Asia Central e que recentemente conseguiu unha prórroga de dous anos máis, aos que o vindeiro curso se lle sumará un novo país, Turkmenistán. O vicerreitor adiantou ademais que a USC vén de solicitar un proxecto Alfa da UE de similares características dirixido a universidades africanas ao sur do Magreb.
Erasmus Mundus na USCDos once estudantes asiáticos que acaban de chegar á institución compostelá 5 proceden de Kirguistán, 3 Uzbekistán e outros tantos de Tayikistán. En Santiago, catro estudarán Empresariais, dous Filoloxía Inglesa, un Dereito, un Económicas e outro Máster en Dirección e Xestión de Empresas Turísticas; mentres que en Lugo dous cursarán Tecnoloxía dos Alimentos.
Neste proxecto, a USC colabora coas universidades europeas Vrije Universiteit Brussels, Paris 3, Andolu University, Wilnius University, Rovaniemi University of applied sciences, Adam Mickiewicz e Masaryk University Brno. Enmarcados no mesmo programa ‘Erasmus Mundus’ existen iniciativas nas que ademais da USC, de España só participan as universidades de Salamanca, Barcelona, Deusto, Granada e Complutense de Madrid.