A USC recibe aos maiores de 25 anos que superaron as probas de acceso á Universidade

A Universidade de Santiago de Compostela celebra este venres, día 25, no Centro de Estudos Avanzados da USC (Parque Vista Alegre. Rúa Salvadas s/n) un acto de benvida aos maiores de 25 anos que superaron as probas de selectividade en Galicia na súa última convocatoria, que foron un total de 99.
A recepción, que se desenvolverá ás 18:00 horas, estará presidida polo vicerreitor de Oferta Docente e Espazo Europeo de Educación Superior, Máximo Plo; e contará ademais coa asistencia do director do CEA, Félix Vidal; o coordinador do programa ‘A Ponte’ no que se enmarca este evento, Luis Hervella; o representante da USC na Comisión Interuniversitaria de Galicia, Manuel Bermejo; e o vicexerente da USC Francisco Colomer.
No acto, no que se lles fará entrega aos asistentes dos correspondentes diplomas acreditativos, o estudante de Enfermaría Juan Carlos Amado contará a súa experiencia universitaria tras superar as probas de acceso para maiores de 25 anos nunha convocatoria anterior. Deseguido terá lugar unha presentación da Universidade compostelá na que se lles informará dos estudos que ofrece, a convocatoria de bolsas, a oferta de residencias e as actividades deportivas e culturais, entre outras cuestións.