Continúa aberto o prazo de matrícula para as escolas deportivas do Campus de Lugo

A Vicerreitoría de Cultura da USC mantén aberto este mes o prazo de inscrición para as escolas deportivas no Campus de Lugo. Esta actividade está orientada a todos os membros da comunidade universitaria e ten como obxectivo a promoción e potenciación do deporte.
As actividades desenvolveranse principalmente no Pazo dos Deportes e na Piscina das Pedreiras. No primeiro haberá ximnasia de mantemento, aeróbic e step os luns e mércores e os martes e xoves en grupos diferentes a partir das 19:30 ou das 20:30 horas. Os martes e xoves, ás 21:15, poderá practicarse esgrima.
No ximnasio da piscina das Pedreiras haberá ioga, tai-chi e tenis de mesa, coa posibilidade de practicar unha hora ou tres horas á semana, tamén a partir das 19:30 horas nas dúas primeiras actividades e das 16:00 no caso do tenis de mesa. Así mesmo, continuarán os cursos de equitación mensuais de iniciación e perfeccionamento e o “pony club”, no Club Hípico Equs, e tamén os de tenis, nunha instalación aínda sen determinar.
A inscrición para estas actividades pode realizarse durante este mes na oficina de deportes do Campus de Lugo, situada no Edificio da Biblioteca Intercentros. As clases darán comezo nos primeiros días do mes de novembro.
AtletismoPor outra banda, continúa en marcha o programa Deporte nos Centros, consistente na realización de actividades como tai-chi, pilates, danza oriental ou sendeirismo, nas distintas facultades.
A Vicerreitoría de Cultura está a programar tamén cursos de tiro con arco e de squash.
Ademais, a USC está a formar un equipo de atletismo para participar nas carreiras do circuíto Corre con Nós, que se celebran en Lugo organizada polo Concello durante o inverno. Os interesados en inscribirse poden facelo tamén na oficina de Deportes do Campus de Lugo.