Suspendida a representación de 'Noite de Reis', de Lugo Cultural, pola enfermidade dunha das actrices

O Centro Dramático Galego suspendeu a representación do espectáculo Noite de Reis. Ou o que queirades, dirixida por Quico Cadaval, debido á enfermidade dunha das actrices principais. Esta obra ía ser representada o luns 17, ás 21:00 horas, no Auditorio Gustavo Freire, dentro da programación de outono de Lugo Cultural.
O CDG aínda non ten decido que día se poderá representar esta obra, que chega a Lugo precedida dun grande éxito de público, con cheos na práctica totalidade das funcións. A montaxe, resultado da primeira incursión de Cadaval no repertorio shakespearano, combina un divertido xogo de enredos, contratempos, malentendidos, enganos e desenganos con apaixonantes historias de amor e desamor.