O Servizo de Deportes abre a inscrición dos cursos intensivos de verán do mes de setembro
Ioga, kung-fu, mindfulness, pilates, tai-chi, ximnasia terapéutica e tenis son as actividades que o Servizo de Deportes da USC oferta na modalidade de cursos intensivos de verán e que se desenvolverán entre o 7 e o 30 de setembro. A inscrición pode formalizarse xa premendo nesta ligazón.
As persoas inscritas deberán acceder con máscara e utilizala sempre no corredor de entrada e saída e no acceso aos aseos, así como respectar a distancia mínima de 1,5 metros. Puntualidade extrema na entrada e na saída para evitar aglomeracións ou utilizar un calzado para o traslado e outro distinto para usar exclusivamente dentro do recinto, son outras das medidas que este Servizo establece para garantir a seguridade dos participantes ante posibles gromos da COVID-19.
Evitar tocar elementos da instalación que non sexan necesarios, realizar os desprazamentos no interior da instalación sen correr e seguindo o plan de circulación sinalizado, así como lavar as mans con auga e xabón na chegada e ao abandonar a instalación ou utilizar o hidroxel a disposición na sala e aseos, serán tamén hábitos indispensables á hora de tomar parte nas actividades ofertadas. Nas clases, manteranse tres metros de distancia mínima e non poderá utilizarse material de uso común, calquera material que se necesite deberá achegalo o alumnado. No caso do tenis, na pista respectarase a distancia mínima de dous metros.