A Aula de Produtos Lácteos da USC promove unha xornada a prol da seguridade alimentaria nos sectores leiteiro e das queixerías

A Aula de Produtos Lácteos e Tecnoloxías Alimentarias (APLTA) da USC organiza en colaboración co grupo empresarial Diversey, líder mundial en solucións para limpeza e hixiene industrial, unha xornada formativa de carácter técnico orientada a mellorar a eficiencia e as garantías de seguridade alimentaria alimentaria nos sectores leiteiro e das queixerías.

Esta acción formativa, que se desenvolverá o vindeiro 28 de novembro nas instalación de que dispón a Aula de Produtos Lácteos e Tecnoloxías Alimentarias da USC no lugués polígono de Sanfiz, servirá de escenario para a presentación de novas formas de enfoque de aspectos clave na hixiene e na seguridade alimentaria. A xornada permitirá asemade achegar ao público participante un abano de ferramentas configuradas para obter e analizar información que, correctamente relacionada cos datos de produción, facilitará a toma de decisións sobre inversións e solucións técnicas acaídas para incrementar o rendemento na planta láctea.

O prazo de inscrición nesta sesión de formación técnica, para que se ofrece un máximo de 50 prazas, permanece aberto ata o 25 de novembro na web da APLTA, onde, ademais do formulario de matrícula, tamén se pode atopar cumprida información respecto do programa dunha xornada que se desenvolverá en quenda de mañá.