A ETSE desenvolve software de analítica avanzada para baloncesto
Nos últimos catro anos, alumnado do Grao en Enxeñaría Informática da USC desenvolveu unha serie de ferramentas informáticas cun alto valor engadido para a análise e preparación de partidos de baloncesto, así como para o perfilado estatístico de posibles fixaches. A última versión desta ferramenta acaba de presentala na ETSE Diego Coladas, quen deseñou novas funcionalidades orientadas a extraer e analizar o tempo de posesión, cruzar esta información coas distintas accións do xogo (tiros, faltas, asistencias, ...) e facer visualizacións das mesmas.
Como explica o profesor David D. Losada, estas aplicacións achegan información valiosa para a toma de decisións nun partido xa que incide en aspectos concretos que poden axudar a unha mellor organización da táctica deportiva. Coñecer cantos segundos de posesión restan no momento no que sucede cada acción permite, por exemplo, analizar que xogadores funcionan mellor en momentos importantes do xogo. As novas tecnoloxías permitirían tamén identificar quen posúe un maior porcentaxe de acerto nos últimos segundos da posesión ou quen finaliza mellor e en que lugares da pista.
Esta iniciativa, comezou en 2017 como unha colaboración entre a Escola Técnica Superior de Enxeñaría (ETSE) da USC, DXC Technologies e a área de analítica de datos do Obradoiro CAB orientada ao deseño e desenvolvemento de software de apoio aos procesos de ‘scouting’ no baloncesto profesional. Fran Camba, analista de datos para o Obradoiro CAB, é o principal promotor deste proxecto colaborativo no que por parte da ETSE participa David E. Losada, profesor da área de Ciencia da Computación e Intelixencia Artificial e investigador adscrito ao CiTIUS) e, por parte de DXC Technology, participa Adolfo Sanz.
A última achega de Diego Coladas Mato, súmase ás de Manuel González López, Lucas Souto Rendo e Pablo Martínez Rodríguez, quen orientaron o seu Traballo Fin de Grao cara esta temática. Entre as funcionalidades do software proposto, atópanse a captura de datos procedentes de múltiples ligas profesionais, a análise e extracción de información procedente das secuencias ‘play by play’ e a visualización avanzada da carta de tiro (lugares da cancha onde os xogadores tenden a acertar/fallar os seus lanzamentos).
Isto permite descubrir información valiosa que non se atopa nas estatísticas habituais dos partidos, aclara David E. Losada. Por exemplo, un pívot que captura 5 rebotes ten unha prestación boa si, cando estaba en cancha, houbo só 7 rebotes en disputa. Pola contra, si se disputaron 20 rebotes entón as súas 5 capturas poden resultar mediocres, aclara o docente. “Este tipo de información é extraíble polo software desenvolvido e, ademais, permite estudar distintas combinacións de xogadores, analizar as súas prestacións conxuntas e visualizar as zonas da pista onde cada quen finaliza mellor as súas accións”. Esta liña de colaboración entre ETSE, DXC Technology e Monbus Obradoiro continuará no próximo curso coa proposta de novas ampliacións a este ambicioso proxecto.
