A Xunta destina 2,8 millóns para "potenciar a actividade investigadora" na USC

A Xunta destinará, a través da Consellería de Cultura, Educación e Ordenación Universitaria, un total de 2,8 millóns de euros para "potenciar a actividade investigadora" na Universidade de Santiago de Compostela (USC).

A medida foi aprobada polo Consello da Xunta na súa reunión deste xoves e plasmarase nun convenio de colaboración entre Educación e a USC que terá como obxectivo fomentar a "especialización" dos campus da universidade compostelá.

As actuacións no Campus Terra, con sede na cidade de Lugo, supoñen un investimento de case 750.000 euros, que irán destinados, como detalla a Xunta, ao "mantemento das estruturas de gobernanza" e a "continuar co desenvolvemento dos plans operativos".

O Campus Terra da USC é un proxecto impulsado pola Secretaría Xeral de Universidades da Xunta de Galicia para transformar o campus de Lugo nun espazo especializado no uso sustentable da terra e dos seus recursos desde unha perspectiva multidisciplinar.

Ademais, pola súa banda, o Campus Vida recibirá 1,8 millóns de euros para "reactivar" as accións do primeiro campus de excelencia internacional, a actualización do seu plan estratéxico e a mellora das súas "infraestruturas singulares".