A ONCE recibe material educativo realizado no Campus Terra da USC

O decano da Facultade de Formación do Profesorado do Campus Terra da USC, Francisco Rodríguez Lestegás; a profesora responsable da materia ‘Dificultades de aprendizaxe e trastornos de desenvolvemento’, María José Fiuza; e o director da axencia administrativa da Organización Nacional de Cegos de España (Once) en Lugo, Roberto Doval Sánchez, participaron no acto de entrega á Once do material didáctico e educativo para a inclusión elaborado por estudantado de último curso do grao de Mestre/a de Educación Primaria dentro do proxecto de Aprendizaxe-Servizo (ApS) que se desenvolve no centro universitario en colaboración coa axencia da Once en Lugo.

A Once forma ao alumnado desta materia na adaptación e/ou creación de diversos materiais inclusivos (contos, maquetas, calendarios ou xogos didácticos como tres en raia, entre outros) que logo se doan á propia Once para a súa distribución nos centros educativos da provincia de Lugo. Esta colaboración permitiu xa a máis de 400 alumnos e alumnas de Formación do Profesorado acadar unha visión pouco usual sobre esta discapacidade e obter unha definición da inclusión máis ampla, sinala María José Fiuza, quen cualifica de “estimulante” este proceso de aprendizaxe. Trátase dun proxecto, engade, que tamén mellora a contorna traballando na eliminación das necesidades detectadas pola Once, ampliando o seu concepto de escola e sociedade inclusiva e fomentando o desenvolvemento das súas competencias sociais e compromiso ético.