O Campus Terra da USC incrementa as ligazóns cunha destilería irlandesa na explotación da madeira galega usada en barricas

O grupo de investigación GI-1720 BioModem (Modelización, Enerxía e Mecanización en Biosistemas) da USC, con sede na Escola Politécnica Superior do Campus Terra da USC,  densenvolve en colaboración empresa irlandesa Irish Distillers Inc. pertencente á multinacional Pernod Ricard dende fai anos unha liña de investigación conxunta orientada á posta en valor dos recursos forestais de Galicia.

Dende fai anos, a elaboración de informes parciais máis puntuais sobre a realidade forestal do monte galego e as súas posibilidades, deu paso a unha colaboración estable no tempo centrada no uso toneleiro do carballo galego e na localización de masas de carballo aptas para ser aproveitadas baixo algún selo de certificación forestal.

Estas investigacións, coordinadas polo profesor Pablo Vila Lameiro e a investigadora Adriana Conde Fernández, que está a facer a súa tese de doutoramento vinculada a esta liña de investigación, están financiadas pola empresa Irish Distillers Inc., que é a propietaria da marca comercial e das adegas de whisky Jameson, ademais doutras moitas referencias coñecidas e con presenza no mercado.

Esta colaboración implica un ciclo cerrado de uso da madeira dende a súa explotación en monte e transformación en Baralla, no aserradoiro Maderbar, pasando pola elaboración de barricas na tonelería gaditana Antonio Páez Lobato, con sede en Xerez da Fronteira, ata o seu destino final en Cork (Irlanda).

Logo de varios años de traballo, con excelentes resultados acadados, a colaboración vai continuar nas liñas xa establecidas de explotación da madeira de carballo, pero ampliando o rango de traballo a outras zonas próximas de interese para estas especies (zona norte de Portugal, por exemplo), así como abrindo unha nova liña de colaboración que incorpora o uso e investigación das aptitudes físicas e tecnolóxicas da madeira de castaño (Castanea sativa) para a industria toneleira e de destilados de whisky.

O escenario de traballo e a actuación que están a desenvolver os investigadores do campus lugués xunto coa destilería irlandesa e as demais empresas implicadas, conta con recoñecemento e apoio, que non con financiamento da Administración autonómica, tendo garantida a súa continuidade varios anos con esta nova liña vinculada ó castiñeiro, tal e como remarcaron os membros da delegación de Irish Distillers durante a súa recente visita ao campus e á provincia de Lugo para supervisar sobre o terreo a evolución dos traballos que se están a realizar. Nesta visita puideron comprobar de primeira man os danos dos recentes lumes no monte galego, tomando conciencia que liñas colaborativas como a que eles manteñen co grupo de investigación BioModem son as que manteñen vivo o monte, asegurando a súa rendibilidade e diminuíndo os riscos de lumes.

As vantaxes deste proxecto céntranse na incidencia e posta en valor da xestión forestal sustentable, un proceso que, segundo indicou Vila Lameiro, actúa como unha garantía engadida que permite aportar un valor complementario a un recurso natural do monte galego, ao tempo que constitúe unha marca de sustentabilidade e apoio ao desenvolvemento rural que outros usos non permiten.

O profesor e coordinador deste proxecto remarcou asemade a repercusión económica deste proxecto, ao que tamén se referiu como unha iniciativa que contribúe á xeración de coñecemento científico e á divulgación do Campus Terra da USC e das actividades de I+D+i que nel desenvolven en congresos internacionais (Roma, Cambridge, Viena...), así como a través da publicación de comunicacións e artigos en revistas científicas de impacto.