O proxecto ZebraNanoTox gaña o premio de emprendemento Santander YUZZ de Lugo
A empresa ZebraNanoTox, impulsada por Vanessa Pérez Cedrón, foi elixida como a mellor idea do centro YUZZ do Campus Terra da USC e obtivo unha praza para viaxar a Silicon Valley xunto aos outros 51 mellores novos emprendedores da oitava edición do Yuzz, o programa de emprendemento que promove Banco Santander a través de Santander Universidades e coordina o Centro Internacional Santander Emprendemento (CISE) coa colaboración do Campus Terra da USC.
O proxecto ZebraNanoTox está centrado en prover servizos de avaliación de toxicidade e eficacia de compostos e nanocompostos nun innovador e recente organismo modelo, o peixe cebra. Pérez Cedrón e a súa colaboradora Carla Gutiérrez, recibiron o premio de mans do vicerreitor de Desenvolvemento Científico e Tecnolóxico do campus de Lugo, Andrés Barreiro Lois. No acto tamén interviñeron Juan José Lirón Lago, subdirector Xeral de Emprego da Xunta de Galicia; Javier Caldeiro Pérez, director da Oficina Universitaria do Banco Santander; Florencio Silvestre Logroño, representante de Secot; e Patricia González Alonso, coordinadora do centro Yuzz Lugo.
O xurado seleccionou o proxecto de Vanessa Pérez Cedrón como o mellor do centro YUZZ Lugo, espazo no que 35 estudantes recibiron formación, asesoramento e mentoring para o desenvolvemento dos seus modelos de negocio. A través de 20 proxectos, as 35 persoas seleccionadas no centro Yuzz Lugo beneficiáronse do acceso a un espazo coworking de alto rendemento na Facultade de Administración e Dirección de Empresas do Campus Terra, onde contaron con espazo físico para desenvolver a súa idea e relacionarse con outros emprendedores, ademais de recibir formación en innovación e modelos de negocio nunha rede de máis de 200 expertos profesionais. Durante esta estadía recibiron asesoramento personalizado para o desenvolvemento do seu proxecto. Para a selección de participantes realizáronse entrevistas persoais tras unha preselección baseada na valoración de aspectos como o perfil emprendedor, a traxectoria persoal, a súa capacidade para comunicar a idea proposta, o compoñente innovador do proxecto, a súa creatividade e o potencial de crecemento do negocio.
Ademais, Coeduca, un proxecto creado por Cecilia Porral Iglesias foi seleccionado como finalista para o premio YUZZ Muller que patrocina a Fundación EY, dotado con 20.000 euros, mentres que EICPar, impulsado por José Angel Hernández Malagón e Antonio Miguel Palomero Salinero, resultou finalista na categoría YUZZ innovación tecnoloxía disruptiva que impulsa INDRA, dotado con 3.000 euros e con apoio e asesoramento dos profesionais de Indraventures. Os premiados recibiron unha tablet e un hosting por xentileza de Raiola Networks, mentres que os segundos e terceiros finalistas gañaron unha hospedaxe no Hotel Piornedo.
Oportunidades en Silicon Valley
O obxectivo desta experiencia que ofrece Santander YUZZ aos gañadores de cada un dos 52 centros de todo o país é inspirar e potenciar aos mozos emprendedores para acelerar o desenvolvemento das súas startups, brindándolles conexións para a internacionalización dos seus proxectos e a procura de financiamento.
A viaxe dunha semana a Silicon Valley inclúe visitas a empresas como Google, LinkedIn ou Facebook e conferencias en prestixiosas universidades como Berkeley ou Standford. Os 52 YUZZers gañadores tamén visitarán o Spain Tech Center (STC) -impulsado por Banco Santander, ICEX e Rede.es-, cuxa meta é facilitar a implantación de PEMES de base tecnolóxica española nunha das contornas máis dinámicas e competitivas do mundo.
Trala viaxe, os 52 mozos asistirán á final nacional dos premios Santander YUZZ 2017 que se celebra na Cidade Grupo Santander de Boadilla del Monte. Un xurado integrado por representantes de Banco Santander, CISE e entidades colaboradoras seleccionarán aos tres mellores emprendedores, que recibirán 30.000, 20.000 e 10.000 euros para acelerar os seus proxectos.
Santander YUZZ promove o talento novo, o espírito emprendedor e o impulso de ideas innovadoras. Nas súas sete edicións anteriores creáronse máis de 500 empresas e potenciáronse os proxectos de máis de 3500 emprendedores.