O reitor Juan Viaño presidiu a toma de posesión de Begoña Barreiro como decana da Facultade de ADE do Campus Terra
O reitor da USC, Juan Viaño Rey, presidiu este martes o acto de toma de posesión da profesora Begoña Barreiro Fernández como decana da Facultade de Administración e Dirección de Empresas do Campus Terra, un cargo académico no que afronta o seu segundo mandato cun equipo renovado, integrado polos profesores Fernando Losada, en calidade de vice decano, e Pablo Durán Santomil, quen desenvolverá as funcións propias da secretaría académica do centro.
A cerimonia protocolaria na que a profesora Begoña Barreiro Fernández formalizou a súa toma de posesión como decana da Facultade de ADE do Campus Terra da USC foi un acto aberto ao público que congregou a unha nutrida representación de docentes e cargos académicos do Campus Terra. Os vicerreitores de Coordinación, Desenvolvemento Científico e Tecnolóxico e Servizos Universitarios do campus de Lugo, Javier Bueno, Andrés Barreiro e Carme Silva, respectivamente, así como a secretaria Xeral da USC, Consuelo Ferreiro, tamén estiveron presentes no acto.
Os obxectivos programados pola decana electa para o centro universitario lugués cara aos próximos anos céntranse na posta en marcha dos distintos acordos e liñas de traballo recollidas xa no plano estratéxico aprobado polo centro, un documento de traballo que fai especial fincapé na xestión sustentable e eficaz dos recursos humanos e que sitúa o alumno e a súa formación como prioridade.
O deseño dunha oferta de titulacións adaptada ás necesidades da sociedade, a transparencia e eficacia da xestión, a relación da Facultade de ADE de Lugo con outros centros universitarios do Campus Terra da USC e tamén doutros campus, a transferencia efectiva de coñecemento á sociedade e a progresiva internacionalización do centro universitario lugués a través dunha maior proxección exterior da Facultade de Administración e Dirección de Empresas, constitúen dous dos obxectivos fixados por Begoña Barreiro para o seu segundo mandato.