O Campus Terra da USC analizará os vínculos entre a dieta e a composición do leite materno

A Universidade de Santiago de Compostela está en trámites de asinar un acordo de colaboración coa asociación lucense pro lactancia materna Bico de Leite coa intención de analizar de que xeito a alimentación das nais inflúe na composición do leite materno. A análise das mostras efectuarase no Laboratorio de Hixiene Inspección e Control de Alimentos do Campus Terra da USC e á fronte da investigación atópanse as investigadoras Cristina Fente e Patricia Regal.

A través dun cuestionario de frecuencias, as nais que voluntariamente decidan participar no estudo mediante a cesión das súas mostras, poderán constatar de que modo o seu tipo de alimentación e estilo de vida incide nas características do seu leite.