O editor do grupo Nature Marc Yeste forma a 21 investigadores do campus de Lugo para a publicación en revistas de impacto

O investigador ‘Ramón y Cajal’ no Departamento de Bioloxía da Universidade de Girona e editor da revista multidisciplinar do grupo Nature Scientific Repports, Marc Yeste, forma no ámbito da publicación científica en revistas de impacto a 21 estudantes da Escola de Doutoramento Internacional (EDI) do Campus Terra da USC a través dun curso monográfico centrado nas claves da publicación científica en revistas de impacto, así como na relevancia que teñen estas achegas para o desenvolvemento dunha carreira científica con éxito.

Todos os alumnos que tomaron parte nesta actividade formativa, coordinada polo profesor de Reprodución e Obstetricia na Facultade de Veterinaria Luis Quintela, están matriculados nalgún dos programas de doutoramento do ámbito das ciencias na EDI do Campus Terra da USC.

A política e a práctica da publicación científica, así como o funcionamento do proceso de publicación e os diferentes modelos de sistemas de revisión centraron os contidos da primeira parte deste módulo de formación, durante o que tamén se trataron cuestións relativas á importancia e repercusión da publicación científica no currículo vitae do investigador en formación.

Este primeiro curso de formación complementaria no ámbito da publicación científica para estudantes de doutoramento e investigadores en formación terá continuidade no campus de Lugo os días 17 e 18 de decembro, datas nas que está prevista a celebración dun módulo de características e contidos centrados na publicación científica pero adaptados aos requirimentos e características que presenta a actividade investigadora nos eidos das humanidades e das ciencias sociais.