Veterinaria achega formación ao sector acuícola para avanzar no control de epidemias en animais acuáticos
A Facultade de Veterinaria do Campus de Lugo da USC achega formación ao sector acuícola e nomeadamente ao persoal do Servizo de Inspección e Control dos Recursos da Subdirección Xeral de Gardacostas de Galicia en materia de epidemioloxía en animais acuáticos, a través dun módulo de formación continua organizado polo Grupo de Anatomía Patolóxica Veterinaria (Gapavet) da USC, que coordina Maribel Quiroga Berdeal.
A actividade formativa, solicitada pola Consellaría do Mar e na que participan veterinarios do Servizo de Inspección e Control dos Recursos da Subdirección Xeral de Gardacostas de Galicia, está impartida polo epidemiólogo veterinario da Universidade de Zaragoza Ignacio de Blas Giral, que é un dos maiores especialistas do mundo en epidemias de animais acuáticos, o que constitúe un dos principais factores limitantes da acuicultura, sinala Quiroga.
O programa do curso, de carácter teórico e práctico, pretende achegar aos profesionais veterinarios participantes a capacidade de deseñar e analizar estudos epidemiolóxicos en poboacións acuáticas, a fin de que o seu traballo contribúa a mellorar a sanidade acuícola. Daquela, ao longo de 20 horas de formación, Ignacio de Blas traballa no marco deste curso sobre competencias especificas na avaliación e interpretación de probas diagnósticas, mostraxes de animais acuáticos, tanto no que atinxe á toma de mostras, métodos de mostraxe o cálculo do tamaño das mostras; deseño de estudos de observación lonxitudinais e transversais e mesmo sobre medición da enfermidade.
O decano da Facultade de Veterinaria do Campus de Lugo, Gonzalo Fernández, acompañado da tamén profesora e vicedecana do centro Maribel Quiroga, e do xefe de Servizo de Inspección e Control dos Recursos da Subdirección Xeral de Gardacostas de Galicia, Pedro Gandarillas, foron os encargados de dar a benvida ás persoas inscritas para tomar parte neste novo módulo de formación demandado desde a Xunta de Galicia para achegar solucións a algunha das problemáticas advertidas no eido da acuicultura.
