Julio Suárez Gómez da USC, campión universitario de España de xadrez
Na competición organizada pola Universidade de Málaga déronse cita 77 estudantes de 26 universidades de toda España
Santiago de Compostela
O alumno do mestrado universitario en Matemática Industrial da USC, Julio Suárez Gómez, acaba de proclamarse campión universitario de España de xadrez no marco da competición organizada pola Universidade de Málaga. A celebración do Campionato de España de Xadrez 2022 contou cun total de 77 aspirantes de 26 universidades de toda España, xunto aos seus adestradores e delegados, superando o centenar de participantes.
O Campionato desenvolveuse como categoría única mixta polo sistema suízo a nove roldas. “O nivel demostrado polos universitarios foi altísimo, sendo moi rifado o resultado final tanto a nivel individual como por universidades, decidíndose a clasificación na última rolda”, explicaron dende a organización desta competición.