O arqueólogo e historiador Javier Gómez Vila ofrece este martes o relatorio ‘A derradeira viaxe de Apana’ na Casa do Saber
A sesión, organizada pola Asociación do IV Ciclo do campus de lugo, comeza ás 20.00 horas. A entrada é libre e de balde para todo o público interesado
O doutor en Arqueoloxía e Historia Antiga pola USC e profesor no Ies Virxe dos Ollos Grandes da capital luguesa Javier Gómez Vila ofrecerá este martes, a partir das 20.00 horas, no auditorio da Casa do Saber de Lugo, o relatorio ‘A derradeira viaxe de Apana, filla de Ámbolo, do castro Miobro’. A entrada é libre e de balde para todo o público interesado.
Neste relatorio, que se encadra no marco das actividades organizadas pola Asociación IV Ciclo Universitario da USC no campus de Lugo, o profesor Gómez Vila disertará sobre a peza referida a Apana, que data de mediados do século I despois de Cristo, e que constitúe un elemento de gran valor ao tratarse do primeiro retrato da época dunha familia galaica ao completo.