O prazo para presentar relatorios ao congreso ‘Violencia de xénero Vs violencia contra as mulleres’ rematará o 12 de novembro
Un congreso internacional abordará os días 27 e 28 de novembro o tema ‘Violencia de xénero Vs violencia contra as mulleres’. Baixo a coordinación da profesora Raquel Castillejo, o encontro mantén aberto o prazo ata o 12 de novembro para que persoas expertas ou persoal investigador en materia de xénero, con independencia do seu ámbito específico, presente propostas de comunicacións.
O programa do encontro arrancará coa conferencia de Miguel Lorente Acosta, médico forense e profesor de Medicina Legal da Universidade de Granada, realizando unha panorámica xeral do fenómeno da violencia de xénero, e continuará abordando cuestións como o exercicio da prostitución, a xestación por substitución ou os aspectos criminolóxicos e vitimolóxicos da trata de persoas con fins de explotación sexual. Na primeira xornada tamén haberá espazo para presentar unha serie de reflexións arredor da delincuencia sexual, con especial atención á cultura da violación ou os movementos #metoo e 8M. O feminicidio ou a relación entre o sistema de xustiza penal e violencia de xénero, serán outras cuestións a abordar xunto co relatorio do catedrático de Psicoloxía Gonzalo Serra no sobre ‘Xénero, trauma e vitimización secundaria: denuncia, dispensa do deber de declarar’.
Na derradeira xornada, o día 28, o relatorio ‘Cómpre ‘introducir’ o xénero no sistema de xustiza penal?’ abrirá o programa do día no que tamén se falará sobre o estatuto da vítima ou se comparará os procesos penais en España e Portugal en relación coa proba nos casos de violencia contra as mulleres. Violencia de xénero e novas tecnoloxías, con especial atención ao acoso e ás súas implicacións educativas, e soberbia e ideoloxía na titpificación da violencia contra a muller no Terceiro Mundo, son as cuestións que completan o abano de temas presentes no congreso.
A presidenta do Observatorio contra a violencia de doméstica e de xénero do Consello Xeral do Poder Xudicial, María Ángeles Carmona Vergara, pronunciará a lección de clausura do encontro titulada ‘Situación actual da muller vítima de violencia de xénero: medo e vergoña a denunciar?’. Para acadar máis información, as persoas interesadas poden consultar a web do encontro.