Aberto o prazo dos segundos premios ‘Responsabilidade social e innovación educativa’ para propostas de aprendizaxe-servizo na docencia

Á segunda edición dos premios ‘ Responsabilidade social e innovación educativa: a aprendizaxe-servizo (ApS) na docencia’ poderán presentarse aquelas experiencias educativas innovadoras relativas á promoción da participación social da USC mediante o desenvolvemento de experiencias de ApS na docencia, realizada no ámbito da USC nos últimos tres anos. A finalidade desta convocatoria é fomentar e poñer en valor a participación social e a innovación educativa da USC cos axentes da súa contorna como ferramenta para o desenvolvemento de proxectos formativo que favorezan a calidade e a empregabilidade do alumnado.

As propostas, a realizar por profesorado con POD do seu departamento no curso 2017/2018 antes do 28 de setembro, incluirán unha breve valoración dos beneficios que supuxo a experiencia mediante a achega de datos do alumnado e dos responsables dos outros axentes colaboradores do proxecto. Outorgaranse un máximo de tres experiencias que o xurado estime de maior calidade, aos que se outorgarán outros tantos premios en metálico de 700, 500 e 300 euros.

O xurado dos premios estará presidido pola vicerreitora de Comunicación, Cultura e Servizos, Mar Lorenzo Moledo e del tamén formarán parte a directora do Centro de Tecnoloxías para a Aprendizaxe (CeTA), Elisa Jato Seijas, catro membros do cadro de persoal docente e investigador de diferentes áreas de coñecemento con experiencia en proxectos de innovación educativa, así como un/unha representantes das ONG e diferentes axentes participantes nos proxectos e o coordinador do Servizo de Participación e Integración Universitaria, Javier Agrafojo.