O Campus Terra impulsa a monitorización de antibiorresistencias con intervencións en fauna, medio ambiente e alimentos
O Campus Terra da USC avanza cara ao control das superbacterias e a diminución dos riscos que provocan tanto na saúde humana como animal a través do proxecto de investigación ‘Seguridade alimentaria: monitorización integrada de antibiorresistencias e dianas de intervención do medio ambiente, á granxa e á mesa’. Este programa, liderado pola investigadora do Laboratorio de Referencia ‘E.coli’ da Facultade de Veterinaria do Campus Terra da USC Azucena Mora e financiado con máis de 200.000 euros pola Axencia Estatal de Investigación do Ministerio de Ciencia e Innovación, supón un novo chanzo no ámbito da ‘One Health’, no que colaboran de xeito coordinado e especialistas en medicina humana e veterinaria, ademais doutros perfís ligados coa microbioloxía, fauna salvaxe e xenómica.
O prazo de execución deste novo programa de I+D estenderase ao longo dos próximos tres anos, segundo indicou a profesora Mora Gutiérrez, que precisou que os distintos socios implicados neste consorcio, no que investigadores do Laboratorio de Referencia ‘E.coli’ e de fauna silvestre da Facultade de Veterinaria da USC, traballarán conxuntamente co Hospital Universitario Central de Oviedo (HUCA) e coa Consejería de Medio Rural e Cohesión Territorial do Principado de Asturias, así como con personal especializado do Laboratorio de Sanidade e Produción Animal (Lasapaga) da Xunta de Galicia, e do Centro de Investigación Biomédica da Rioxa (CIBIR). O Laboratorio de Riscos Alimentarios de Berlín e a Universidade de Copenhague son outras das entidades que colaboran nunha iniciativa investigadora, que, segundo indicou Azucena Mora, permitirá transferir resultados e coñecementos de utilidade tanto para o Plan Nacional de Resistencia a Antibióticos, coma para outras universidades, como é o caso de Murcia, ademais de para o tecido empresarial.
A investigadora principal deste proxecto de monitorización sincronizada de antibiorresistencias en alimentos, fauna e medio ambiente xustificou a pertinencia desta actuación pola necesidade de poñer freo á crecente pegada das chamadas superbacterias e, de ser o caso, mitigar os múltiples riscos que implican para a saúde a través da coñecemento de indicadores que permitan a adopción e mecanismos previos de control ou extinción das bacterias resistentes aos antibióticos.
A profesora Azucena Mora, que este mércores acadará a condición de catedrática do Departamento de Microbioloxía da USC, afondará sobre algunhas das actuacións concretas incluídas neste proxecto e respecto do posible impacto científico, social e económico que deparen os resultados do estudo dalgúns elementos clave, tales como produtos cárnicos dispoñibles á venda para o seu consumo, patóxenos específicos, infeccións do tracto urinario en humanos e cans, carne de xabarín e mesmo mostras de auga. A análise destes bioindicadores pode achegar información de relevo para avanzar na vixilancia e no control da emerxencia provocada na saúde humana e animal polas resistencias a antibióticos.
