O meu elemento.

As Nacións Unidas declararon 2019 o Ano Internacional do Sistema Periódico, conmemorando os 150 anos da publicación por Dimitri Mendeleev da táboa periódica dos elementos químicos.

A CNL da Facultade de Ciencias de Lugo propón unha actividade para sumarse a esta celebración: o concurso de vídeos  “O meu elemento”, dirixido tanto a toda a comunidade universitaria galega como ao alumnado da ESO e de 1º e 2 de bacharelato de Galicia.

O obxectivo do concurso é atraer o interese do alumnado sobre este acontecemento e a actividade científica en xeral, así como poñer de manifesto a naturalidade da expresión dos contidos científicos en lingua galega.

A participación no concurso consiste na presentación dun vídeo en lingua galega sobre un elemento químico, de entre 30 e 90 segundos, e co enfoque que se queira. O prazo remata o vindeiro 24 de abril. Para iso cómpre cubrir o formulario de datos e envialo a fcdeca@usc.es.

Premios: Na categoría correspondente ao alumnado de ESO e bacharelato, hai un primeiro premio de 300 euros, un segundo de 150 euros e un terceiro de 100 euros. Para a categoría da comunidade universitaria, os galardóns son: un primeiro premio de 500 euros, un segundo de 200 euros e un terceiro de 100 euros.