Galicia e o Norte de Portugal disporán dun ‘living lab’ transfronterizo de innovación en Saúde

A USC forma parte do consorcio do proxecto INNOV4LIFE, unha iniciativa que establecerá un ‘living lab’ transfronteirizo entre Galicia e o Norte de Portugal. Esta iniciativa axudará a pechar a brecha entre as persoas innovadoras con tecnoloxías que necesitan ser validadas (unha fase crucial dun proceso de innovación) e os usuarios finais que forman parte do grupo demográfico ao que se dirixen estas solucións. “Créanse así as condicións que permiten probar a recepción e adopción de solucións dixitais para a Saúde entre os usuarios finais, na súa propia contorna”, explican dende o proxecto no que participa os profesores da USC, David Facal e Arturo Xosé Pereiro Rozas. A xuntanza de lanzamento do proxecto desenvolveuse na Universidade de Porto os días 27 e 28 de novembro. 

O proxecto está a tecer unha rede de socios, no que tamén participan SERGAS, ACIS e AFAGA Alzheimer, para facilitar a validación de novas solucións dixitais na área da Saúde. Coordinada pola Universidade do Porto, a través do Centro de Competencias en Envellecemento Activo e Saudable da Universidade do Porto, Porto4Ageing, a rede ten tamén como socios UPTEC e Santa Casa de Misericordia de Riba de Ave. A iniciativa botará a andar centrándose na demencia e na dexeneración cognitiva.

Programa INTERREG

O proxecto INNOV4LIFE está cofinanciado pola Unión Europea (a través do Fondo Europeo de Desenvolvemento Rexional, FEDER), no marco do programa Interreg– Programa de Cooperación Transfronteiriza España-Portugal (POCTEP). O programa promove a cooperación entre diferentes rexións europeas en problemas ou cuestións compartidas.