O I Congreso de Medicina e Rehabilitación de Fauna Salvaxe cita esta fin de semana máis dun centenar de persoas no Campus Terra
O I Congreso de Medicina e Rehabilitación de Fauna Salvaxe, un foro organizado polas asociacións Aenda-Avafes Lugo citará este fin de semana máis dun centenar de participantes no auditorio da Facultade de Veterinaria do Campus Terra da USC, o escenario onde se desenvolverán as distintas sesións programadas no marco deste congreso, orientado a estudantes e profesionais interesados na recuperación de fauna salvaxe.
O decano da Facultade de Veterinaria da USC, Germán Santamarina, presidirá este sábado, a partir das 10.00 horas, a sesión de apertura deste congreso, no que intervirán como relatores ao longo de dúas xornadas un total de sete profesionais procedentes de diferentes ámbitos e lugares de España, pero que comparten como denominador común a súa gran experiencia no sector da rehabilitación de fauna salvaxe.
O biólogo e veterinario Pascual Calabuig Miranda, que traballa desde fai tres décadas no Centro de Recuperación de Fauna Silvestre de Tarifa, abrirá a quenda de relatorios deste congreso cunha intervención sobre os rescates de cetáceos varados vivos. A rehabilitación de mamíferos salvaxes autóctonos centrará, a continuación, a intervención de Rafael Molina López, veterinario do Centro de Fauna Salvaxe de Torreferrusa, en Barcelona.
A coordinadora do máster oficial Zoonosis and One Healht da Universidade Autónoma de Barcelona, Laila Darwich, abrirá a quenda de tarde cunha exposición sobre o enfoque de saúde única que rexe nos centros de recuperación de fauna salvaxe. O director do hospital de fauna salvaxe de Amus, Álvaro Guerrero, e Jara López, veterinaria interina deste centro, pecharán a primeira xornada deste foro con intervencións referidas ao funcionamento deste complexo hospitalario, así como respecto da disciplina que se require para a recuperación e aves.
A conservación do lince ibérico e o programa de seguimento sanitario da súa poboación centrará a temática do primeiro relatorio do domingo, que correrá a cargo do veterinario Guillermo López Zamora. A actuación do veterinario en proxectos de conservación de réptiles, a rehabilitación de tartarugas e as especies invasoras completan a relación de asuntos que abordarán ao longo da xornada Albert Martínez Silvestre, veterinario responsable do Centro de Recuperación de Anfibios e Réptiles de Cataluña, e Pascual Calabuig.