A Aula de Produtos Lácteos e Chr. Hansen reúnen 20 profesionais nun curso de elaboración de queixo de pasta branda
A Aula de Produtos Lácteos e Tecnoloxías Alimentarias (APLTA) do Campus Terra da USC e a compañía Chr. Hansen citan esta semana nun programa de formación teórica e práctica centrada na elaboración de queixos de pasta branda.
Os responsables dos laboratorios de propiedades físicas e de análises sensorial da APLTA, Juan Ventura Trillo e Paz Fernández-Albalat, respectivamente, achegaron ao público asistentes información teórica sobre a tecnoloxía empregada para a fabricación deste tipo de queixos, no marco dunha xornada inicial na que tamén participaron como relatores David Muñoz e José Manuel González, técnicos de Chr. Hansen.
Esta primeira sesión do curso abordou cuestións relativas á preparación do leite, cultivos de maduración, coagulación e tipos de coagulantes, acidificación e desorado, maduración e traballo en cámaras de afinado e tratamento dos defectos de maduración. A mellora da produtividade e dos rendementos coa aplicación de COAGUSENSTM e a realización de análises das propiedades físicas e sensoriais na valoración de pastas brandas completaron este bloque formativo inicial.
As dúas últimas xornadas deste programa de formación para o sector produtivo tiveron un marcado carácter práctico, polo que as sesións programadas consistiron en obradoiros de elaboración de queixos camembert tradicional e estabilizado, así como de queixo crescenza.
