Bota a andar a primeira convocatoria para a creación de contidos dixitais formativos e de divulgación
A Vicerreitoría de Transformación Dixital e Innovación da Universidade de Santiago de Compostela acaba de publicar as bases da convocatoria para a creación de contidos dixitais formativos e de divulgación. Grazas a ela, o persoal docente e investigador da USC poderá contar co apoio dunha oficina de virtualización para o tratamento dos contidos dos que xa dispoña ou ben, que elabore para a ocasión, sendo o fin último destes contidos quedar a dispor da comunidade estudantil e da sociedade en xeral en forma de contidos dixitais de alta calidade e con licenzas abertas.
A oficina tratará os contidos segundo a súa orixe: os xa existentes serán normalizados, adaptándoos e actualizándoos, de ser o caso, mentres que os novos contidos e recursos dixitais pasarán por unha fase de deseño e produción. En ambos casos será o paso previo para a súa publicación nas novas ferramentas corporativas con licenza aberta.
As persoas solicitantes deberán ser membros do PDI, PI ou grupos de innovación docente da USC, e terán ata o día o 30 de abril de 2024 para presentar a súa solicitude de participación. A información completa da convocatoria, así como o anexo de solicitude, poden consultarse no espazo web do Centro de Formación de Persoal e no Taboleiro Electrónico da USC.