Ciencias da Educación analiza os seus estudos de doutoramento nun simposio co gallo do 50 aniversario dos estudos de Pedagoxía
Con motivo da celebración dos 50 anos dos estudos de Pedagoxía na Universidade de Santiago de Compostela, a Facultade de Ciencias da Educación, xunto co Departamento de Pedagoxía e Didáctica e o Instituto de Ciencias da Educación (ICE), organizan esta semana o Simposio Internacional sobre o Doutoramento en Educación ‘Coñecemento e Acción Transformadora’.
Entre outros obxectivos, o persoal investigador do ámbito da educación analizará a situación e perspectivas do doutoramento no marco da Sociedade do Coñecemento. Ademais, dialogarase sobre a relevancia e calidade dos programas de doutoramento, estudaranse as súas distintas modalidades, e xeraranse espazos de debate e participación do estudantado de doutoramento en Educación.
A sesión inaugural presidiuna esta mañá na Facultade de Ciencias da Educación do Campus Sur o reitor Antonio López e contou ademais coas intervencións de José Alberto Díez de Castro, secretario xeral de Universidades da Xunta de Galicia; Mar Lorenzo Moledo, decana da Facultade de Ciencias da Educación da USC; Carmen Fernández Morante, directora do Instituto de Ciencias da Educación da USC; Pablo Taboada Antelo, director da Escola de Doutoramento Internacional da institución compostelá (EDIUS) e Miguel A. Santos Rego, profesor da USC e presidente do Comité Organizador do Simposio. Logo da apertura, tivo lugar a conferencia ‘Doutoramento e Liderado en Educación: xestionar a incerteza’ a cargo da profesora da Universidade de Helsinki (Finlandia) Kirsi Pyhältö.
O simposio continúa con numerosas mesas de comunicacións e paneis sobre as novas rutas na formación dos Programas de Doutoramento en Educación e o prestixio e rendibilidade laboral dos estudos. O xoves 16 haberá ademais a conferencia do profesor Santos Rego ‘O Doutoramento Profesional en Educación ou como facer Investigación baseada na práctica’ e a de clausura, ás 12.30 horas, a cargo de Isabel Menezes, da Universidade de Porto (Portugal), e titulada ‘O Doutoramento en Educación: un título ou un recurso de construción dunha cidadanía académica?’.
