O reitor da USC preside este venres a entrega do XVII Premio Aresa de Desenvolvemento Rural na Facultade de Veterinaria

O reitor da Universidade de Santiago de Compostela, Juan Viaño Rey, e o fundador de Aresa, Álvaro Rodríguez Eiras, presidirán este venres, a partir das 20.00 horas, no auditorio da Facultade de Veterinaria do campus de Lugo, a cerimonia de entrega do XVII Premio Aresa de Desenvolvemento Rural, un galardón dotado con 10.000 euros en metálico e que nesta ocasión recaeu na Asociación de Criadores de Ovino y Caprino de Galicia (Ovica).

A presidenta de Ovica, María do Carmen Fernández Carreira, recollerá o galardón outorgado polo grupo Aresa e a USC no transcurso dunha cerimonia durante a que o profesor de Economía Agraria na Escola Politécnica Superior do Campus Terra da USC Francisco Sineiro, ofrecerá un relatorio baixo ‘ O sector lácteo galego no mercado global’. A cerimonia de entrega do XVII Premio Aresa de Desenvolvemento Rural congregará este venres na Facultade de Veterinaria de Lugo un nutrido grupo de representantes políticos, ademais de persoeiros dos eidos económico, social e cultural, así como clientes e provedores do grupo empresarial Aresa.