Ana María Bermejo Barrera, nova directora do INCIFOR

A profesora da USC, Ana María Bermejo Barrera, é a nova directora do Instituto Mixto de Ciencias Forenses ‘Luis Concheiro’ (INCIFOR), que desenvolve funcións docentes e de investigación na área de Medicina Legal, así como de asesoramento á Administración de Xustiza. A profesora Bermejo substitúe no cargo a Victoria Lareu.  

Catedrática de Toxicoloxía na USC dende 2007, a profesora Bermejo exerceu como secretaria do INCIFOR dende o ano 2012, onde tamén é responsable do laboratorio de toxicoloxía forense. Ten exercido como investigadora principal nunha decena de proxectos e en numerosas actividades de transferencia. A súa produción científica abrangue a dirección dunha vintena de teses de doutoramento e máis dun cento de publicacións.

O INCIFOR é un Instituto de carácter mixto, creado por mor dun convenio entre a USC e a Consellería de Xustiza, Interior e Relacións Laborais da Xunta de Galicia no ano 1992, aínda que leva realizando labores de investigación e servizos desde o ano 1978. Inicialmente foi denominado Instituto de Medicina Legal. Ofrece unha ampla carteira de servizos que están ao dispor tanto de organismos públicos, como de clientes privados.