Preséntase en Dereito o Informe sobre a xustiza administrativa 2017
Enmarcado no ciclo de actividades do Observatorio Internacional da Regulación das Entidades do Sector Público que dirixe o profesor da USC Marcos Almeida Cerreda, este martes 14 terá lugar en Dereito a presentación do Informe sobre a Xustiza Administrativa 2017.
No acto, ás 16:30 horas no Salón de Graos, intervirán o decano da Facultade, Gumersindo Guinarte; o catedrático de Dereito Administrativo da USC Luis Míguez Macho; o presidente da Sala do Contencioso do TSX de Galicia, José María Gómez y Díaz-Castroverde; a directora do Centro de Investigacións sobre Xustiza Administrativa, Silvia Diez Sastre; e o avogado e coordinador da Área de Dereito Administrativo do MUAPA, Paulo López Porto.
O Informe sobre a Xustiza Administrativa 2017 é un estudo dirixido por Silvia Diez e coordinado por César Martínez Sánchez e do que son autores tamén Alfonso Egea de Haro, Alfonso Esteban Miguel, Alicia González Alonso (UAM) e Fernando Pastor Merchante (IE Universidad).
O traballo consolídase nesta terceira edición como a principal obra de análise empírica do funcionamento da xustiza administrativa en España, abordando os problemas de forma integral e innovadora e tomando en conta cinco sectores de referencia: tributos, contratos públicos, responsabilidade patrimonial, dereitos fundamentais e persoal da Administración.
Como en anteriores ocasións, estúdase o funcionamento da xurisdición contencioso-administrativa, pero tamén das vías administrativas previas así como o impacto das reformas normativas no bo funcionamento da xustiza administrativa. Así mesmo, xunto a parámetros de carácter cuantitativo, profúndase en determinados estándares de actuación substantiva vinculados á calidade da xustiza administrativa, como pode ser a presentación de proba, a imposición de costas ou o tipo de tutela brindado nas sentencias. Este sinal de identidade diferenza este informe doutros que se centran unicamente en datos cuantitativos, así como no funcionamento do control meramente xudicial da Administración.