A USC pode favorecer a participación en actividades de formación externa do PTXAS e do PI, autorizando a asistencia na xornada de traballo ou financiando a actividade, sempre que se cumpran determinadas condicións e de acordo cos procedementos establecidos.
1. Autorización para asistir a unha actividade de formación externa dentro da xornada de traballo
O solicitante deberá requirir a autorización á persoa responsable da unidade administrativa á cal pertenza a través da aplicación de rexistro horario, escollendo o tipo de solicitude: «ausencia autorizada» e tipo de ausencia: «asistencia a curso de formación».
2. Financiamento da actividade de formación externa
O Centro de Formación de Persoal (CFP) poderá asumir o financiamento cando nin el mesmo nin as unidades de gasto que consideren esta formación necesaria poidan atendela directamente, e sempre dentro das súas dispoñibilidades orzamentarias.
En calquera caso, non se financiará (art. 26.4 do Regulamento do CFP):
- Os módulos, cursos, ou materias, conducentes á obtención de títulos académico de carácter oficial e validez en todo o territorio nacional.
- Os cursos dos mesmos idiomas que se impartan nos plans de formación da USC e no Centro de Linguas Modernas.
- A asistencia a congresos, xornadas, seminarios ou actividades de análoga natureza.
3. Procedemento de solicitude de financiamento:
3.1. Solicitude ao Centro de Formación de Persoal
O solicitante deberá presentar unha solicitude xeral, como mínimo quince días antes do comezo da formación, a través da Sede Electrónica da USC co asunto «solicitude de financiamento de formación externa» e acompañada de:
- Un informe xustificativo que acredite a necesidade da formación para o correcto desempeño das funcións do posto ou para o desenvolvemento dun plan ou proxecto aprobado na USC, asinado pola persoa responsable do servizo ou unidade correspondente. Modelo dispoñible nesta ligazón da intranet do CFP.
- A información e datos completos sobre a actividade formativa: título da actividade, organismo convocador, obxectivos, programa (contidos, docentes, etc.), lugar, datas e horario de realización, importe da matrícula e outros gastos necesarios (transporte, aloxamento, manutención) de ser o caso.
3.2. Decisión do Centro de Formación de Persoal
O CFP notificará, no prazo máximo de 15 días naturais desde a recepción da solicitude e sempre antes do comezo da formación, á persoa beneficiaria e á responsable da unidade á que estea adscrita, a autorización ou rexeitamento do financiamento.
A autorización dará lugar a que a asistencia á actividade formativa teña consideración de comisión de servizo con dereito a indemnización e implicará:
- O CFP adiantaralle á persoa solicitante o importe correspondente á matrícula ou inscrición na actividade.
- Os custos dos medios de locomoción, aloxamento e manutención necesarios para asistir á formación serán indemnizados de acordo co Regulamento de Indemnizacións por razón do servizo da USC.
4. Obrigas das persoas beneficiarias no caso de que o CFP autorice o financiamento
- Tramitar e pagar a inscrición e matrícula na actividade, cuxo importe lle será adiantado polo CFP.
- Asistir á totalidade da acción formativa e, de ser o caso, realizar a proba final de aproveitamento. A non asistencia só será xustificada por causas de forza maior debidamente acreditadas. Se non está xustificada, poderá ser penalizada e suporá, en todo caso, a devolución íntegra dos importes recibidos da USC en concepto de matrícula ou inscrición, así como a perda do dereito ao aboamento dos demais gastos relacionados coa actividade formativa.
- Achegar ao CFP, unha vez finalizada a acción formativa, os xustificantes de asistencia e o certificado de aptitude (de ser o caso).
- Achegar as xustificacións dos gastos xerados, de cara ao reintegro das cantidades adiantadas (en caso de que as houbera).
- Aplicar os coñecementos adquiridos na mellora do desempeño do traballo e facilitar a súa transferencia ao resto do persoal da unidade.