A Sociedade Europea de Biomateriais recoñece o papel de iMATUS como centro de referencia investigadora en Europa
A Sociedade Europea de Biomateriais recoñeceu cun dos seus premios europeos de doutoramento Julia Polak 2025 a Ana Iglesias Mejuto e Miguel Pereira Silva, que realizaron a súa tese de doutoramento en iMATUS da USC. O galardón distingue persoal investigador novo que completou un doutoramento de excelencia no ámbito dos biomateriais e a enxeñería de tecidos, valorando tanto a calidade da súa investigación como a súa formación internacional.
A tese doutoral de Ana Iglesias Mejuto, titulada ‘Development of aerogel-based formulations for regenerative medicine’ realizouse baixo a co dirección de Inés Ardao Palacios, do grupo Biofarma da USC, e Carlos Alberto García González, da Facultade de Farmacia e iMATUS. A súa investigación céntrase no desenvolvemento de novas formulacións baseadas en aeroxeles para aplicacións en medicina rexenerativa, contribuíndo ao deseño de biomateriais innovadores con potencial terapéutico. Na actualidade, Ana sigue vinculada a iMATUS como contratada posdoutoral.
Pola súa banda, a tese de Miguel Pereira titulada ‘Design and development of gemcitabine-loaded nanoplatforms for advanced pancreatic cancer-targeted therapies’ levouse a cabo no contexto dunha colaboración internacional baixo a dirección de Carmen Álvarez Lorenzo, da Facultade de Farmacia e iMATUS, e Ana Cláudia Paiva-Santos e Francisco Veiga, da Universidade de Coimbra. O traballo aborda o deseño e desenvolvemento de nanoplataformas para tratamento de cancro de páncreas avanzado, achegando solucións prometedoras para mellorar a eficacia e especificidade dos tratamentos. Pereira incorporouse hai uns meses como investigador contratado ao MD Anderson Cancer Center (USA), un dos centros máis prestixiosos no seu ámbito.
Para a directora de iMATUS, Carmen Álvarez, a obtención do Julia Polak Award “supón un recoñecemento internacional á excelencia investigadora e formativa de ambos galardoados, e reforza o papel de iMATUS como centro de referencia europeo no campo dos biomateriais”.
A Sociedade Europea de Biomateriais concede anualmente este premio a persoal investigador que cumpre con criterios de excelencia académica e científica, incluíndo estadías internacionais, publicacións en revistas de alto impacto e participación activa en congresos internacionais, seguindo os estándares de calidade establecidos en honor á profesora Dame Julia Polak. O premio entregarase este ano no transcurso da 34 Conferencia Anual da Sociedade que terá lugar en Torino (Italia) no mes de setembro.