O grupo Metabolic Homeostasis and Vascular Calcification do CiMUS recibe unha doazón de 10.000 euros para avanzar no estudo da proxeria
O grupo de investigación Metabolic Homeostasis and Vascular Calcification, dirixido por Ricardo Villa-Bellosta no Centro de Investigación en Medicina Molecular e Enfermidades Crónicas (CiMUS) da USC, acaba de recibir unha doazón da Asociación Progeria Alexandra Peraut por valor de 10.000 euros que se destinarán a impulsar o avance científico fronte á proxeria.
Tamén coñecida como síndrome de Hutchinson-Gilford, a proxeria é unha enfermidade xenética rara que afecta aproximadamente a 1 de cada 20 millóns de nacementos en todo o mundo. Caracterízase por un avellentamento acelerado en nenos/as, chegando a desenvolver alopecia, rixidez articular, alteracións cardiovasculares e fraxilidade ósea dende idades moi temperás. A esperanza de vida media das persoas que a padecen é de apenas 14 a 15 anos, e actualmente non existe unha cura definitiva, aínda que se están investigando tratamentos que podan mellorar a súa calidade e esperanza de vida.
Esther Martínez, presidenta da Asociación e nai de Alexandra, subliñou a importancia deste xesto solidario: “Alexandra ensínanos cada día a importancia de non renderse nunca. Como nai, sei que a investigación é a única ferramenta real para atopar un tratamento, e por iso esta doazón representa un paso máis cara a esperanza.”. Pola súa banda, Ricardo Villa-Bellosta agradeceu a confianza depositada no seu grupo sinalando a importancia da achega, “este respaldo non so axuda economicamente, tamén motiva a seguir traballando con máis forza. Detrás de cada experimento están as familias que confían en nós, e ese compromiso impúlsanos a avanzar con rigor e paixón”.
O grupo que lidera o doutor Villa-Bellosta no CiMUS se centra en entender os mecanismos celulares e metabólicos que explican o avellentamento acelerado e as alteracións vasculares propias da proxeria. Estes estudos son fundamentais para o desenvolvemento de posibles terapias que freen a progresión da enfermidade e melloren a vida dos/as pacientes.
Esther Martínez destacou o valor da colaboración entre familias e equipos de investigación, “cada euro destinado á investigación significa un paso máis cara a cura. Confiamos en que o traballo do equipo do CiMUS poida marcar a diferencia para Alexandra e para todas as crianzas que viven con proxeria.” Neste mesmo sentido, Ricardo Villa considera que “nun contexto no que as enfermidades raras reciben escasa atención por parte de gobernos e farmacéuticas, a doazón da Asociación Progeria Alexandra Peraut demostra que a unión entre familias e ciencia pode transformar a esperanza en futuro”.
O mesmo investigador asegura que “a investigación en proxeria necesita do impulso colectivo”, Na súa opinión “cada achega, con independencia da súa magnitude, representa un paso máis cara tratamentos que melloren a calidade e a esperanza de vida dos nenos e nenas afectados por esta enfermidade rara. A sociedade, as institucións e as empresas teñen a oportunidade de sumar esforzos e transformar a esperanza en futuro, apoiando proxectos científicos que buscan respostas onde hoxe aínda non as hai”, conclúe Ricardo Villa-Bellosta.