Recital de órgano de Marta López Fernández na Igrexa

O órgano da Igrexa da Universidade volverá soar este mércores 20 da man da artista compostelá Marta López Fernández. No recital, ás 20:00 horas e con entrada libre, interpretará pezas dos séculos XVI e XVII obra de, entre outros, William Byrd, Antonio de Cabezon, Jan Pieterszoon Sweelinck, Pablo Bruna, Henry Purcell ou Joan Cabanilles.

A organista e clavecinista Marta López traballa na actualidade en Londres como especialista en música antiga. Convidada recentemente como artista residente na casa museo Handel&Hendrix, formou parte do proxecto MusaE organizado polas Xuventudes Musicais de España, presentando un programa de clavecín só no Museo Nacional de Artes Decorativas.

O seu interese polos instrumentos de teclado históricos levouna a realizar concertos en importantes coleccións como as de Fenton House, Hatchlands Park, Horniman Museum e Handel House. Premiada en dúas ocasións coa Guildhall Artist Fellowship do Departamento de Musica Antiga da Guildhall School of Music & Drama, Marta López estudou clavecín e órgano con James Johnstone e Carole Cerasi.

Comezou os seus estudos de órgano na súa cidade natal da man de Bruno Forst, especializándose no repertorio ibérico. Ademais, asistiu á Academia de Órgano de Smarano e participou en master classes impartidas por Menno van Delft, Richard Egarr e Olivier Baumont, entre outros.

Ademais da súa faceta solista, Marta colabora a miúdo con diversas orquestras e ensembles en producións de ópera, oratorio e música de cámara. Grazas a este interese polo labor de continuo foi convidada a participar na academia da prestixiosa orquestra Age of Enlightment. Cabe destacar, ademais, actuacións xunto con Academy of Ancient Music, Eboracum Ensemble, Alba Consort e The Little Orchestra. Traballou cos directores John Butt, Pavlo Beznosiuk e Eamonn Dougan, entre outros.