Medicina acolle este venres unha xornada divulgativa polo Día Mundial do Parkinson
A enfermidade de Parkinson é a segunda enfermidade neurodexenerativa máis frecuente en persoas maiores de 65 anos e afecta en España a unhas 160.000 persoas, cun diagnóstico de aproximadamente 10.000 novos casos cada ano, segundo a Sociedade Española de Neuroloxía (SEN).
Con motivo do Día Mundial do Parkinson, que se celebra cada 11 de abril, o Centro de Investigación Biomédica en Rede sobre Enfermidades Neurodexenerativas (CIBERNED), o seu grupo representante en Galicia, o de Neurobioloxía Celular e Molecular da Enfermidade de Parkinson da USC e as asociacións de pacientes de Santiago de Compostela (ASPAC) e Vigo (PARKVIGO) organizan este venres 12 una xornada divulgativa no Salón de Actos da Facultade de Medicina.
A xornada pretende contribuír a visibilizar o impacto real da enfermidade de Parkinson na poboación e informar, en especial a pacientes e familiares, sobre a enfermidade e os avances actuais no seu tratamento. A inauguración, ás 16.00 horas, contará coa presenza do alcalde Martiño Noriega, representantes da Consellería de Sanidade e da Universidade de Santiago de Compostela, asociacións de pacientes, a xerente de CIBERNED, Ángeles Pérez, e o profesor José Luis Labandeira García, que dirixe o grupo investigador representante de CIBERNED en Galicia.
Para coñecer de primeira man o seu impacto social e emocional participarán representantes das Asociacións de Pacientes, que mostrarán o traballo deste tipo de asociacións. Ademais, contarase coa actuación do coro Parkinson Canta, da Asociación Parkinson de Vigo; as actividades relacionadas coa música achegan importantes beneficios aos pacientes, como evidencian diversos estudos científicos, e ofrecen unha mellora na calidade de vida complementaria á acción dos fármacos.
O evento inclúe cinco relatorios nos que se enfocará a enfermidade desde diferentes perspectivas. O profesor Labandeira realizará unha introdución sobre o Parkinson e as últimas investigacións levadas a cabo. Para coñecer outros aspectos da patoloxía contarase coa participación dos neurólogos expertos en Parkinson Ángel Sesar, do CHUS; Diego Santos, do CHUAC; e Carmen Labandeira, do Hospital Universitario Álvaro Cunqueiro de Vigo. Por parte das asociación intervirán a psicóloga de ParkVigo, María Lens Villaverde, e un representante de Aspac.