O persoal docente e de investigador e de administración e servizos elixiron aos seus representantes sindicais

Un total de 1.972 persoas exerceron o dereito a voto nas eleccións sindicais celebradas este xoves 9 na USC, cun índice de participación do 45,23%, o que representa un aumento do 2,72% con respecto ás eleccións celebradas en 2015. O maior incremento de participación concéntrase entre o colectivo do Persoal de Administración e Servizos (PAS), que pasou en termos xerais do 50,10% ao 57,28% e un total de 1.066 votos emitidos, 591 de persoal funcionario e 475 de laboral. Entre o colectivo do Persoal Docente e Investigador (PDI) a participación incrementouse nun 0,75%, pasando do 35,51 ao 36,25%. Neste último colectivo acudiron ás urnas un total de 906 docentes e investigadores/as (377 laborais e 529 funcionarios).

Comités e xuntas de persoal
Segundo os datos provisionais, a Xunta de Persoal que representará ao PDI funcionario estará conformada por 7 delegados/as de CCOO, outros tantos de CSIF, 5 de CIG e 4 de UGT. Polo que respecta ao PDI laboral, o seu comité integrarano 10 delegados/as de CSIF (8 por Santiago / 2 por Lugo), 9 de CIG (7/2), 7 de UGT (4/3) e 6 de CCOO (4/2).

A Xunta de Persoal de PAS funcionario quedará integrada por 5 delegados/as de TGU, 4 de CIG, outros tantos de CCOO, 3 de CIUS e 1 de UGT. O PAS laboral estará representado polo 17 delegados/as de CCOO, 11 de CIG, 2 de CSIF e 2 de UGT. Neste último colectivo e desagregando estes datos xerais, en Santiago CCOO conseguiu 10 delegados/as (7 no colectivo de Técnicos e Administrativos / 3 no de Especialistas e non cualificados), CIG 9 (5/4), CSIF 2 e UGT 2. No Campus de Lugo, CCOO obtén 7 delegados/as (4/3) e CIG 2 (1/1).