Aberta a inscrición no obradoiro de interpretación teatral do IV Ciclo arredor da figura de Manuel María

A USC vén de abrir o prazo de inscrición no obradoiro de interpretación teatral para membros do IV Ciclo Universitario arredor da figura de Manuel María, unha actividade formativa que se desenvolverá todos os mércores lectivos desde o 18 de novembro de 2015 ata o 1 de xuño de 2016, en horario de 13:00 a 14:30 horas.

A visualización do teatro como unha ferramenta útil de socialización e de adestramento físico e vocal é un dos obxectivos deste obradoiro, cuxos participantes traballarán cara a construción dunha dramaturxia colectiva a través da vida e da obra de Manuel María. As distintas sesións programadas no marco deste obradoiro de iniciación teatral, que será impartido por Paloma Lugilde, afondarán sobre cuestións relativas á formación, coñecemento e escoita do grupo, ademais de traballar no adestramento e expresividade corporal, respiración, vocalización, montaxe teatral e posta en escena. O prezo da matrícula é de 60 euros para integrantes do programa de IV Ciclo da USC e de 78 euros para persoas alleas á comunidade universitaria. O prazo de inscrición permanecerá aberto ata a data de comezo do obradoiro nas oficinas da área de Cultura da Vicerreitoría de Coordinación do campus de Lugo. As distintas sesións formativas desenvolveranse no auditorio da Casa do Saber e na Aula de Teatro e Danza da Facultade de Veterinaria.