A fase galega da V Olimpíada de Xeoloxía cita este martes na USC arredor de 200 estudantes de secundaria e Bacharelato

A celebración da fase autonómica da V Olimpíada de Xeoloxía citará este martes, día 18 de febreiro, nos campus de Lugo e de Compostela arredor de 200 estudantes de secundaria e Bacharelato.

Este certame, promovido polo Colexio de Xeólogos, a Sociedade Xeolóxica Española e a Asociación Española para a Ensinanza das Ciencias da Terra, terá como sedes nesta edición, a Facultade de Bioloxía de Compostela, a Escola Politécnica Superior de Lugo e a Escola de Minas de Vigo, que serán os espazos nos que se desenvolvan as distintas probas programadas na V Olimpíada de Xeoloxía, unha cita que rexistra un sensible aumento de participantes respecto de edicións anteriores. Os obxectivos desta actividade educativa, en cuxa organización colaboran de xeito activo a Vicerreitoría de Estudantes, Cultura e Formación Continua, o programa ‘A Ponte’ e o departamento de Edafoloxía e Química Agrícola da USC, pasan por espertar no estudantado preuniversitario o interese polos contidos propios da Xeoloxía e do conxunto das Ciencias da Terra, ademais de fomentar novas vocacións universitarias neste campo do saber e de salientar a importancia da preservación do medio natural. A decana da Facultade de Bioloxía, María Luz González, e o coordinador do programa ‘A Ponte’, Luis Hervella, darán a benvida dos estudantes inscritos para participar na V Olimpíada de Bioloxía no campus compostelán, onde o vicerreitor de Estdudantes, Cultura e Formación Continua da USC, Francisco Durán, tamén participará no acto de clausura e entrega de premios. O director da Escola Politécnica Superior, Javier Bueno, e os profesores deste centro universitario lugués, Esperanza Álvarez e Javier López, darán a benvida este martes, ás 11.30 horas, aos preto de 50 estudantes inscritos para completar na EPS as probas teóricas e prácticas da fase autonómica da V Olimpíada de Xeoloxía, un abano de actividades que se prolongará en quenda de tarde e que tamén inclúe a visita ás instalacións do centro universitario lugués. Unha vez rematado o programa de actos deseñado, o salón de actos da Escola Politécnica Superior acubillará, a partir das 18.30 horas, a cerimonia de entrega de agasallos aos participantes e premios para os gañadores no marco dun acto no que tamén participará o vicerreitor de Coordinación e Planificación do campus de Lugo, Pedro García Herradón. Os/as tres gañadores/as da fase galega da V Olimpíada de Xeoloxía poderán participar na fase estatal deste certame, cuxas probas se celebrarán o 29 de marzo en Toledo, de onde sairá a selección de estudantes que participará na fase internacional da Olimpíada de Xeoloxía, un certame que se celebrará en xullo na cidade estadounidense de Vermont.