A USC pecha o venres 6 o terceiro prazo de matrícula nos cursos programados na Universidade de Verán 2014
A programación de cursos da Universidade de Verán continuará ao longo da terceira semana do mes de xuño a celebración de sete novos cursos en distintos emprazamentos dos campus de Lugo e de Compostela. O prazo de matrícula para estes programas formativos e de divulgación, cuxa temática é moi diversa e abrangue cuestións relativas ao tratamento da obesidade, agricultura familiar e agroecoloxía, comunidades de aprendizaxe, reforma local, márketing deportivo ou anacos da arte na Idade Media, remata o próximo venres, día 6 de xuño.
A programación da Universidade de Verán 2014 para a terceira semana do mes de xuño contempla a celebración de cinco cursos en Santiago. O día 16 está previsto o comezo do programa ‘Avances en avaliación, tratamento e xestión de trastornos mentais e do comportamento’, que se prolongará ata o día 20 baixo a dirección de María del Carmen del Río Nieto. O curso ‘Comunidades de aprendizaxe. Inclusión, éxito educativo e desenvolvemento comunitario’, dirixido por Carmen Morán de Castro e Germán Vargas Callejas, desenvolverase na Facultade de Ciencias da Educación do 16 ao 18 de xuño.
O mércores 18 de xuño comezará a celebrarse na Facultade de Dereito o programa ‘A reforma local’, unha proposta dirixida por César García Novoa e Antonio López Díaz e estruturada en 25 horas lectivas. De xeito parello ao desenvolvemento desta proposta incluída na Universidade de Verán 2014, o Instituto de Estudos Galegos Padre Sarmiento acubillará do 18 ao 20 de xuño o programa ‘Retazos da Arte, sociedade e cultura na idade media europea: oratores, laboratores e bellatores’, desenvolvido baixo a dirección de Manuel Núñez Rodríguez e David Chao Castro. Doutra banda, o Paraninfo da USC acubillará do 22 ao 22 deste mes as ‘Xornadas sobre novos modelos de financiamento e márketing deportivo’, dirixidas por Luis Alberto Otero e Loreto Fernández. Campus de Lugo O campus de Lugo acollerá ao longo da terceira semana do mes de xuño dous cursos programados no marco da Universidade de Verán 2014. O programa ‘Novos enfoques no tratamento da obesidade’, dirixido por Alberto Cepeda e José Manuel Miranda, desenvolverase na Facultade de Ciencias do 16 ao 18 de xuño. A data de conclusión deste curso de verán da USC coincide co comezo doutro dos títulos ofertados, como é ‘Agricultura familiar agroecolóxica’. Este programa, dirixido por Xan Neira Seijo e Anna Cervera, celebrarase na sede do Ibader do 18 ao 20 de xuño. O alumnado que se matricule nestes cursos de verán da USC poderá validar a súa asistencia como créditos de libre elección ou optativos. Para diplomaturas, mestres, enxeñarías, enxeñarías técnicas e licenciaturas a validación será en forma de libre elección, dous por cada curso de 30 ou máis horas e un polos de menos de 30 horas. Pola súa banda, para os graos a validación será de dous créditos optativos por cada curso de 25 horas ou máis e dun para os de menos de 25. Taxa xeral e reducida
A USC mantén as mesmas taxas de matrícula que en anteriores edicións con dúas modalidades, xeral e reducida. A primeira, de 120 euros para os encontros de máis de 25 horas e de 70 para os seminarios e xornadas que non superen esta cifra. A taxa reducida está dirixida ao estudantado de calquera universidade ou estudos de formación profesional ou bacharelato, pensionistas, persoas desempregadas, así como PDI e PAS da USC. Neste caso, os prezos a pagar serán de 70 e 40 euros, segundo a carga lectiva do curso. Máis información en http://www.usc.es/cultura/uveran14index.htm.