A USC presenta o seu proxecto de danzaterapia no II Encontro Artes pola Integración

A Universidade de Santiago participa esta semana no II Encontro Artes pola Integración que se desenvolve na Coruña para presentar diversos proxectos de danzaterapia e danza como instrumento de integración. A primeira actividade na que participa será este xoves 23 coa charla ‘Proxecto de danzaterapia na Universidade de Santiago de Compostela’ a cargo do psicopedagogo Daniel Pregal. Xa o venres será a quenda do director artístico da Compañía de Danza Espazo Integra2 da USC, Juan Carlos Zahera, que falará da danza universitaria e a integración. Xa o sábado a compañía de danza Espazo Integra2 da USC presentará no Museo de Belas Artes un fragmento do traballo realizado dentro do proxecto CampUSCulturae titulado ‘Donde reside la ternura’ . Trátase dunha experiencia de integración formativa e creativa vinculada aos espazos de representación que permiten as diferentes artes e, máis concretamente, as artes do corpo. A coreografía de ‘Donde reside la ternura’ aúna todos os mundos creativos con forza humanizadora, vitalista e, en definitiva, transformadora.