O Consorcio Europeo de Lipodistrofias presentouse oficialmente en Compostela

Preto de 40 grupos de investigación de 14 países da Unión Europea e da Federación Rusa conforman o Consorcio Europeo de Lipodistrofias (European Consortium of Lipodystrophies-ECLip) que este martes 2 se presentou oficialmente en España. A presentación, que coincide co Día Mundial das Lipodistrofias, celebrouse na Aula Magna José Varela de Montes do Pavillón Docente Novoa Santos coa participación do reitor Juan Casares Long; do xerente de Xestión Integrada de Santiago, Luis Verde; do director do CIMUS da USC, Carlos Diéguez; do director do IDIS, José Castillo; do presidente da Federación Española de Enfermidades Raras, Juan Carrión; e da presidenta da Asociación Española de Lipodistrofias, Naca Pérez; e do coordinador de ECLip, o profesor da USC David Araújo-Vilar. Na rede teñen cabida grupos de investigación que estudan as particularidades das lipodistrofias no eido clínico e básico, entre eles a Unidade de Enfermidades Tiroideas e Metabólicas da USC. Excluíndo a SIDA, as lipodristrofias son un conxunto de enfermidades do tecido adiposo de moi baixa prevalencia. Como se explicou na presentación, aínda que a característica clínica máis salientable desta doenza é a perda, total ou parcial, de tecido adiposo, nestas doenzas adoitan aparecer diabetes mellitus, dislipemia e fígado graxo. Por outra banda, algúns subtipos de lipodistrofias, moi raros, son especialmente graves xa que levan a un proceso de avellentamento prematuro. Como explicou no acto o profesor Araújo-Vilar, o Consorcio xunta a experiencia, coñecementos e capacidades dos máis salientables equipos europeos de investigación na materia. A súa misión máis inmediata será establecer un rexistro europeo de doentes con lipodistrofia e deseñar un guieiro clínico e terapéutico destes procesos. Ademais de traballar na busca de novos xenes candidatos susceptibles de atoparse implicados na enfermidade, o Consorcio marcará as liñas mestras de actuación na investigación patoxenética e fisiopatolóxica, ademais de promover a creación de unidades de referencia clínica en cada un dos estados membros e o intercambio de investigadores entre os distintos laboratorios e unidades clínicas. Outra finalidade será fomentar a creación de asociacións de doentes, mantendo un forte vencellamento con eles. Logo da presentación do consorcio, o profesor da Universidade de Cambridge David B. Savage ofreceu a conferencia ‘ Lipodistrofia: os perigos da vida sen graxa’.