Premian un estudo sobre as diferenzas nos resultados entre homes e mulleres dun tratamento para deixar de fumar
As diferenzas entre homes e mulleres á hora de someterse a un tratamento para deixar de fumar son o obxecto do traballo que gañou este ano os IV Premios á Introdución da Perspectiva de Xénero na Docencia e na Investigación na USC. En concreto, o estudo analiza as diferenzas nos resultados a curto e longo prazo dun tratamento psicolóxico e del resulta que os perfís de personalidade son distintos, “o que podería levar a ter que deseñar tratamentos específicos para as mulleres”, explicou unha das autoras, Ana López-Durán, no acto de entrega dos galardóns. Asinan o traballo premiado Ana López-Durán, Elisardo Becoña Iglesias, Bárbara Piñeiro Neiro, Úrsula Martínez Pradera, Carmela Martínez Vispo e Elena Fernández del Río, que recolleron o diploma e o cheque correspondente de 1.000 euros nun acto en San Xerome presidido pola vicerreitora de Responsabilidade Social e Calidade, Benita Silva Hermo. Interviñeron ademais o vicerreitor adxunto de Investigación e Innovación, Pablo Ramil Rego, e a secretaria xeral de Igualdade, Susana López Abella. Mais este non foi o único premio entregado na categoría investigadora –a de docencia quedou deserta -. O segundo posto foi para o traballo ‘Conciliación da vida persoal e familiar: unha análise das percepcións das persoas responsables dos centros da USC’, de Adolfo Carballo Penela e María Dolores Álvarez Pérez, que se fixa especialmente na cultura amigable coa familia; e o terceiro para ‘Prevención da depresión en universitarias’ que asinan Ángela Torres Iglesias, Olga Díaz Fernández, Vanessa Blanco Seoane, Patricia Otero Otero, Elisabet Hermida García e Fernando Vázquez González, que confirmou a “importante efectividade” desta clase de programas de prevención. A convocatoria da Vicerreitoría de Responsabilidade Social e Calidade, subvencionada pola Secretaría Xeral da Igualdade da Xunta de Galicia con financiamento do Fondo Social Europeo, busca promover e visibilizar a introdución da perspectiva de xénero na docencia e na investigación desenvolvida na universidade compostelá. A participación do persoal da USC nesta convocatoria –este ano concorrían 9 traballos– “ reafírmanos –explicou Benita Silva– na necesidade de implementar proactivamente a cuestión de xénero e muller nos programas académicos”. Neste sentido, avanzou algunha das actuacións que a súa Vicerreitoría propón no Plan Estratéxico de Igualdade de Oportunidades de Mulleres e Homes como a inclusión de forma transversal de contidos de xénero en accións formativas dirixidas a PDI e PAS, a inclusión de temática específica nos procesos de selección de persoal, a creación dunha liña de publicacións que difunda estudos sobre cuestións de muller e xénero ou ofrecer asesoramento técnico para introducir esta temática nos proxectos da USC. Xurado experto O xurado encargado de avaliar as candidaturas presidiuno a vicerreitora de Responsabilidade Social e Calidade e integrárono ademais a coordinadora da Oficina de Igualdade de Xénero da USC, Eva Aguayo Lorenzo; a directora do Instituto de Ciencias da Educación, Ana Mª Porto Castro; o decano de Ciencias da Comunicación, Xosé Pereira Fariña; o catedrático de Psicoloxía Social Ramón Arce Fernández; a profesora de Organización de Empresas Ángeles López Cabarcos; e a docente de Xerografía Humana Monserrat Villarino Pérez. O grupo gañador do primeiro premio, intervindo Ana López-Durán Adolfo Carballo interviñendo no nome do grupo gañador do segundo premio Por parte do grupo que se fixo co terceiro premio interveu Fernando Vázquez
