A madrugada do sábado ao domingo atrásanse os reloxos

A madrugada deste sábado para o domingo 27 haberá que atrasar os reloxos unha hora de maneira que ás 3.00 serán de novo as 2.00. Pásase así ao chamado horario de inverno que durará ata finais de marzo e no que a hora oficial peninsular española será a do Tempo Universal Coordinado máis 1 hora. Segundo informa o director do Observatorio Astronómico Ramón María Aller da USC, José Ángel Docobo, ata o ano 1918 a hora oficial en España coincidía co Tempo Universal (Tempo Solar Medio de Greenwich) e logo adiantouse 1 hora nos veráns dos anos 1918, 1919, 1924, 1926, 1927, 1937, 1938 e 1939. A partires de 1940 a hora oficial pasou a ser a do Tempo Universal máis 1 (+1) e ademais nos veráns dos anos 1940, 1942, 1943, 1944, 1945, 1946 e 1949 se adiantou unha máis. Este criterio foi xa a partir de 1974 sen interrupcións o seguido para establecer a hora oficial peninsular (agora regulado por unha normativa europea) aínda que nun principio o troco de hora se facía no mes de setembro en vez de outubro.