Fondo pesar na Universidade polo falecemento de Isaac Díaz Pardo

A Universidade de Santiago de Compostela, na persoa do seu reitor Juan Casares Long, manifesta o seu profundo pesar polo falecemento de Isaac Díaz Pardo, figura senlleira deste país con recoñecemento internacional e amigo sempre da Universidade. “Marcha un loitador incansable, magnífico pensador expoñente da excelencia intelectual de Galicia que durante toda a súa vida mantivo lazos de colaboración e amizade coas institucións que, como a universitaria, son confluencia de cultura e coñecemento”, manifesta o reitor nun comunicado. A súa figura intelectual, literaria, artística e política, unida á súa faceta emprendedora tamén no eido empresarial, deixará “un pouso indeleble nesta institución”, da que dende 1992 era doutor honoris causa. “Estarémoslle sempre agradecidos”, sentencia Juan Casares.