Un curso da USC analiza os cambios producidos na serra do Courel como consecuencia do abandono dos usos tradicionais

O curso de verán A dinámica da biodiversidade: análise dos cambios consecuencia do abandono de usos tradicionais desenvolverase entre os días 4 e 6 de setembro na Estación Científica da USC na localidade de Seoane do Courel e está dirixido polo catedrático de botánica Javier Guitián. O día 4 a xornada comeza cun relatorio sobre a xeomorfoloxía e a vexetación do Courel, a cargo do catedrático de Xeografía da USC Augusto Pérez-Alberti. A continuación Luís Guitián, profesor de Xeografía da USC, intervirá para falar sobre a relación entre a actividade agrícola e a vexetación da zona. A sesión de mañá complétase cunha charla sobre as unidades de vexetación específicas desta área por parte de Javier Guitián, director do curso. Pola tarde, o propio Javier Guitián coordinará unha actividade de campo para o recoñecemento destas unidades de vexetación. A xornada de mañá do día 5 estará dedicada á elaboración da base cartográfica mediante ferramentas informáticasna Estación Científica do Courel, sesión dirixida por Augusto Perez-Alberti e Luís Guitián Rivera; a actividade completarase pola tarde cun traballo de campo por grupos para a asignación das unidades de vexetación ás unidades cartografadas. Os mesmo profesores coordinarán a actividade do día 6, que consistirá na elaboración do mapa definitivo de cada territorio analizado na Estación Científica do Courel. O curso rematará coa presentación dos resultados e un debate posterior entre todos os asistentes. A actividade consta dun total de 24 horas lectivas, e a matrícula pode realizarse a través da páxina web da Área de Cultura da USC.