A Facultade de Física retransmite en directo o seminario do CERN no que se agarda o anuncio de importantes avances na procura do bosón de Higgs

A Facultade de Física da USC retransmitirá en directo este mércores 4 o seminario do CERN onde se agarda o anuncio de importantes avances na procura do bosón de Higgs. A cita será a partir das 9.00 horas na Aula Magna da Facultade, dende onde se conectará co auditorio central do CERN en Xenebra para presenciar en tempo real o encontro organizado baixo o título ‘Últimos avances na busca do bosón de Higgs’. A chamada ‘partícula de Deus’ é a responsable do valor da masa do universo. No LHC do CERN suízo estanse levando a cabo todos os experimentos que permitan por fin comprender a estrutura da materia a nivel subatómico.