Economía e enxeño en cinco minutos... este xoves entréganse os premios do certame ¡Grávao e cóntanolo!

A aula B da Facultade de Económicas será este xoves 29 o espazo que acolla a exhibición das curtas finalistas do certame ‘Tes cinco minutos....¡Grávao e cóntanolo!’ que organizou a Comisión de Normalización Lingüística do centro. Na gala pública de entrega de premios, a celebrar ás 19.30 horas conducida pola actriz Isabel Risco, exhibiranse as seis curtas finalistas Canción euro, Rescate, Morto polo euro, A man invisible do Estado, Conversas entre veciñas e Sen un peso. O xurado encargado de valorar estes traballos está formado polo vicedecano de estudantes da Facultade de Ciencias Económicas e Empresariais, Alejandro Ballesteros Ron; a presidenta da Comisión de Normalización Lingüística da Facultade de Ciencias da Comunicación, Marta Pérez Pereiro; e Isabel Vaquero Quintela, técnica de Normalización Lingüística da Universidade.