A Escola de Doutoramento Internacional da USC desenvolve a segunda fase do seu programa de axudas para a realización de teses de doutoramento no eido das ciencias da vida

Elixir aos mellores e máis preparados novos titulados que teñan destacado nos seus estudos universitarios e queiran realizar unha investigación no campo das Ciencias da Vida nun contorno privilexiado e con grupos de calidade investigadora contrastada. Con esta filosofía arranca a segunda fase do programa de axudas predoutorais en réxime de concorrencia competitiva para a realización de teses de doutoramento no marco da Escola de Doutoramento Internacional de Ciencias Biomédicas e Tecnoloxías da Saúde (EDI). Logo da presentación de propostas por parte dos grupos de investigación, nesta segunda fase seleccionaranse candidatos para a realización de teses de doutoramento no eido das ciencias e tecnoloxías da vida baixo a dirección de investigadores doutores adscritos aos programas de doutoramento pertencentes á EDI. A convocatoria contempla axudas de ata un máximo de tres anos en forma de contrato con catorce mensualidades de 1.173 euros. As persoas interesadas poden presentar a súa solicitude ata as 14:00 horas do próximo 20 de setembro. Esta é unha iniciativa incluída na estratexia de captación de talento da Escola de Doutoramento Internacional, eido no que a EDI pretende ser un referente nas áreas relativas ás ciencias da vida aglutinadas ao redor de Campus Vida. Dende esta dimensión, a Escola centrará os seus esforzos en dar unha formación investigadora aos doutorandos pero tamén en provelos das ferramentas que lles permitan desenvolver a súa carreira profesional máis alá dos laboratorios.

As persoas interesadas en ampliar esta información poden consultar as bases da convocatoria na páxina web da Escola de Doutoramento Internacional http://www.usc.es/gl/centros/cptf/doutoramento/EscolaDoutoramento.html.