O reitor presidirá a entrega dos premios correspondentes ao XI Concurso de Proxectos Empresariais Innovadores da USC

O reitor Juan Casares presidirá este martes 21 o acto de entrega dos premios do XI Concurso de Proxectos Empresariais Innovadores da USC nun acto que se vai celebrar a partir das 11.30 horas no Salón Reitoral do Colexio de San Xerome. No acto de entrega intervirán ademais o director xeral de Promoción do Emprego da Consellaría de traballo, Andrés Hermida Trastoy; a vicerreitora de Responsabilidade Social e Calidade, Benita Silva; o vicerreitor adxunto de Investigación e Innovación, Pablo Ramil; e o director do programa Uniemprende, Carlos Hernández Sande. A viabilidade do proxecto, o grao de innovación dos produtos ou servizos ofrecidos, o volume de emprego proxectado, o seu carácter multidisciplinar ou a súa atención ás políticas de igualdade foron os criterios valorados polo xurado na avaliación dos 41 proxectos presentados a concurso. Á convocatoria estaba dirixida ás tres universidades galegas e aos centros asociados da UNED en Galicia, así como a empresas constituídas ao longo de 2010 que presenten un proxecto empresarial innovador.

A convocatoria contempla un primeiro premio de 5.000 euros e ata outros 24.000 de préstamos participativo a cargo de Unirisco Galicia SRC e un segundo de 3.000 euros. Ademais establecéronse outras tres categorías que recibirán 2.000 euros cadansúa por iniciativas de Empresa Xove, Muller Emprendedora e Proxecto Emprendemento Social.