A Universidade de Santiago impúxolle a Francisco Orallo a Insignia de Ouro a título póstumo

A Universidade de Santiago de Compostela rendeulle este venres unha homenaxe póstuma ao profesor Francisco Orallo Cambeiro, do Departamento de Farmacoloxía, falecido en decembro do pasado ano.
Orallo foi investigador principal de diversos proxectos de investigación, autor de numerosas comunicacións en revistas especializadas de recoñecido prestixio internacional e director de nove teses de doutoramento, ademais de referee de revistas de Farmacoloxía de recoñecida calidade científica e avaliador de proxectos de investigación na área de Farmacoloxía e Fisioloxía da ANECA.
O grupo de investigación que lideraba o pasado ano o profesor Orallo posúe unha dilatada experiencia na avaliación farmacolóxica e estudo do mecanismo de acción de novos fármacos de orixe natural e sintético con potencial actividade biolóxica, fundamentalmente sobre o sistema cardiovascular e sobre as plaquetas sanguíneas.
A súa traxectoria académica valeulle diversos galardóns como o Premio da Sociedade Española de Química Terapéutica, o de Investigación da Xunta de Galicia en Ciencias da Saúde ou o Premio Nacional de Farmacoloxía, entre outros. Recentemente a Facultade na que exercía como docente concedeulle, a título póstumo, a súa medalla pro meritis.
A cerimonia

Agora foi a USC quen se quixo sumar a todos os merecidos recoñecementos a un profesor moi apreciado e valorado na Facultade de Farmacia. Precisamente é nese centro onde o reitor Senén Barro Ameneiro lle entregou a Insignia de Ouro da institución ás irmás do homenaxeado, Gemma e Plácida Orallo Cambeiro, ambas licenciadas en Farmacia pola USC.

Nesa cerimonia, á que asistiron colegas e amizades de toda España, interviñeron o decano da Facultade, Juan José Torres Labandeira; o director do Departamento de Farmacoloxía, Luís Miguel Botana López; o membro do Grupo de Investigación ‘Farmacoloxía vascular e plaquetaria’ que coordinaba o profesor Orallo, Matilde Yañez Jato; e a presidenta da Asociación de Estudantes de Farmacia da USC e presidenta da Federación Española de Estudantes de Farmacia, Sara Serrano Estrada.

A continuación distintas persoas que coñeceron moi de cerca ao profesor finado participaron nunha mesa redonda, ‘Paco Orallo: Visión humana e científica dun estudante e docente da USC’, acompañando así ao decano da
Facultade. O acto rematou cunha conferencia da catedrática de Farmacoloxía da Universidade de Valencia, María Jesús Sanz Ferrando.